رحلة النسيان
كتبهاالشاعر / محمد وهبة ، في 23 أغسطس 2007 الساعة: 22:29 م
وعديت لك
على الأشواك انا مشيت لك
وجيت لك
رغم أحزانى
ورغم الخوف فى ألحانى
ورغم الليل
انا جيت لك
وعديتلك حدود الآه
وسافرت فى بلاد الله
عشان قلبى يغني لك
بشوق وانتي تغنى معاه
وغنيت لك …. غناوى كتير
وكنتي أميرة الأحلام
وانا ….. فارس من الأساطير
وكان الحلم جوايا
كما حكاية
بتغزل كل يوم طرحة
وميت فرحة
تنور لك لياليكى
وانا ……. ليكى
وفاتح لك شبابيكى
وشفتك ساكنة فى وريدى
تصحى الليل …… بتنهيدى
وكنتي القصد ……… وقصيدى
وكان فى عيونك العنوان
وفجأة لقيتنى متغرب
وبتهرب
لا نجمة من السما تقرب
وتكشف لك فى قلبى حنان
ظلمت كثير فى اشواقى
وكنت عليكى مش باقى
وضيعتك ……..
وعشت لذكرياتى أسير
حبيبتى مش بقول واحكى
عشان اصعب على قلبك
عشان تبكى ……. تسامحينى
حبيبتى ………. روحى …… نور عينى
ما نيش طالب خلاص قربك
لكن ارجوك
انسينى
ـــــــــــــــــــــــــــــــــــــــــــــــــــــــــ
التصنيفات : شعر عامية | السمات:شعر عامية
دوّن الإدراج
